រដ្ឋមន្រ្តីការងារជំរុញឱ្យវិស័យឯកជនចូលរួមអនុវត្តកាតព្វកិច្ចហ្វឹកហ្វឺនកូនជាងដើម្បីឱ្យយុវជនមានឱកាសពង្រឹងសមត្ថភាពជាក់ស្តែង
ភ្នំពេញ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានជំរុញឱ្យវិស័យឯកជនចូលរួមអនុវត្តកាតព្វកិច្ចហ្វឹកហ្វឺនកូនជាង ដើម្បីឱ្យយុវជនមានឱកាសពង្រឹងសមត្ថភាពជាក់ស្តែងក្រោយបញ្ចប់ការសិក្សា។
លោក ហេង សួរ លើកឡើងដូចនេះ ក្នុងឱកាសអនុញ្ញាតឱ្យក្រុមប្រឹក្សាភិបាលនៃសមាគមមូលនិធិសម្តេចតេជោដើម្បីអភិវឌ្ឍន៍សហគ្រាសធុនតូច និងមធ្យមដែលដឹកនាំដោយអ្នកឧកញ៉ា តែ តាំងប៉ ជួបសម្តែងការគួរសម នាថ្ងៃទី២៣ ខែកុម្ភៈ ឆ្នាំ២០២៤ នៅទីស្តីការក្រសួង។
រដ្ឋមន្ត្រីការងារ បានបញ្ជាក់ទៅកាន់វិស័យឯកជនឱ្យចូលរួមអនុវត្តការបំពេញកាតព្វកិច្ចហ្វឹកហ្វឺនកូនជាងដែលមានចែងក្នុងច្បាប់ដើម្បីជួយជំរុញការពង្រឹងសមត្ថភាពដល់សិក្ខាកាម និងនិស្សិតក្នុងប្រទេសឱ្យបានស្វែងយល់ពីកិច្ចការងារជាក់ស្តែងក្នុងការត្រៀមស្វែងរកការងារក្រោយបញ្ចប់ការសិក្សា។
ទន្ទឹមនោះ លោក ហេង សួរ ក៏បានលើកឡើងថា ការអនុវត្តកាតព្វកិច្ចដ៏សំខាន់នេះ ក៏អាចឱ្យនិយោជកអាចមានឱកាសជ្រើសរើសបុគ្គលិកនៅនឹងកន្លែងស្រាប់ ហើយក៏ជាឱកាសការងារសម្រាប់សិក្ខាកាមវិញផងដែរ។
លោកក៏បានបញ្ជាក់ទៅកាន់ក្រុមប្រឹក្សាភិបាលសមាគមថា ក្រសួងបានត្រៀមខ្លួនរួចជាស្រេចក្នុងការជួយសមាគមលើការបណ្តុះបណ្តាលដល់បុគ្គលិកក្រោមឱវាទរបស់សមាគមប្រសិនបើមានតម្រូវការដើម្បីពង្រឹងសមត្ថភាព និងការបង្កើនផលិតភាព។
ជាមួយគ្នានេះ អ្នកឧកញ៉ាប្រធានក្រុមប្រឹក្សាភិបាល បានថ្លែងអំណរគុណរដ្ឋមន្ត្រីការងារ និងប្តេជ្ញាចូលរួមជាមួយរាជរដ្ឋាភិបាលក្នុងការជំរុញការបណ្តុះបណ្តាលវិជ្ជាជីវៈដើម្បីធ្វើឱ្យសហគ្រាសធុនតូចនិងមធ្យមនៅកម្ពុជាអាចដើរតួនាទីយ៉ាងសំខាន់បន្ថែមទៀតក្នុងការជ្រោងសេដ្ឋកិច្ចជាតិ៕